KALIBO, Aklan—Nag-abot sa 2,112 nga nagkaeain-eain nga loose firearms ukon mga baril nga owa it lisensiya ag 316 nga eksplosibo ro nakumpiska it Police Regional Office 6 umpisa Enero hasta Hunyo it makaron nga dag-on nga nagresulta sa pagka-aresto sa 358 nga mga indibidwal nga nag-eabag sa laye.
Suno kay P/Lt. Col. Arnel Solis, spokesperson Police Regional Office 6 nga sa nasambit nga numero, 414 kara hay nabo-oe sa ginpatigayon nga mga police operations ukon iron hand approach kun sa siin hugut nga ginapatuman ro law enforcement pinaagi sa focused-police operations.
Samtang, ro 1,698 nga iba pa hay ginsurender, ginpatago ukon gin-abandona it mga nagapanag-iya pinaagi sa soft hand approach ukon ‘Tokhang Panagbalay’.
Ro Negros Occidental Police Provincial Office sigon ro nakarekober it maabu nga armas nga nag-abot sa 653 ag 92 halin sa Bacolod City Police Office; ro Aklan Police Provincial Office hay nakabo-oe man it 205 nga armas; Antique nga may 259; Capiz nga may 208; Guimaras nga may una nga 32 , Iloilo Province nga may 367 ag ro Iloilo City hay may 60 kamana man ro Regional Mobile Force Battalion nga may una nga 236.
Sa pampasabog, ro NOCPPO hay nakalista it 118, Iloilo PPO nga may 60, Antique PPO nga may 49, Aklan PPO nga may 40, Capiz PPO nga may 28, BCPO nga may 11, Iloilo City Police Office nga may 5, ro Regional Mobile Force Battalion nga may 4 ag Guimaras PPO nga may 1.
Sa kapareho nga period ro Aklan PPO hay naka aresto it 205 nga nag-eabag sa RA 10591 bangud sa illegal possession of firearms.
Ginpahayag ni Solis nga ro pagpatuman it ‘Tokhang Kontra Armas Luthang ukon TKAL hay nagatuyo nga mapabaskog ro kampanya kontra kriminalidad eabi eon ro pagtapna sa pagkalhit it loose firearms.
