KALIBO, Aklan—Naka-alerto ro Municipal Disaster Risk Reduction and Management Council ukon MDRRMO-Kalibo agud nga masiguro ro kaeowasan it mga magatambong sa tatlong adlaw nga Kalibo Ati-Atihan Opening Salvo sa maabot nga Oktubre 4 hasta 6.
Suno kay Terrence June Toriano, head it MDRRMO-Kalibo nga may nakadeploy sanda nga mga tawuhan halin sa special operations unit agud nga magresponde sa anuman nga emergency nga posibleng matabu sa selebrasyon.
Raya hay paga-umpisahan it Ginuman Fest sa Kalibo Pastrana Park sa October 4 nga magabuhay hasta alas-2:00 it aga-aga.
Haeos dere-deretso sigon ro andang pagbantay bangud nga pagasundan raya “1st Mayor Juris B. Sucro Hala BiRun Marathon” bandang ala-1 it aga-aga it October 5 para sa mga bagito ag seasoned runners nga halin sa nagkaeain-eain nga parte it nasyon.
Pagkatapos it misa sa Kalibo Cathedral ag blessing it bag-ong stage it Kalibo Pastrana Park ag Children’s playground hay igasarado sigon nanda ro kanto it Mabini St. ag Desposorio Maagma St. bandang alas-12:00 it udtro adlaw para sa pagpasundayag it libu-libo nga mga drummers ag kapin sa 85 nga tribu ag grupo.
Ro sadsad ukon street dancing hay magatapos sa Kalibo Pastrana Park.
Ro programa para sa opening salvo hay maga-umpisa alas-6:00 it gabi-i nga pagasundan it fireworks display.
Samtang, dugang pa ni Toriano nga ro andang preparasyon hay kapareho sa selebrasyon it Ati-Atihan Festival kun sa siin hugut nga seguridad ro ginapatuman.
