KALIBO, Aklan—Pabor si Terrence Toriano, head it Municipal Disaster Risk Reduction and Management Office ukon MDRRMO-Kalibo nga boe-on eon ro pagsuksok it face mask eabi eon kon sa guwa it baeay ukon open space ag owa it maabu nga tawo.
Sa pihak kara, ginpahayag ni Toriano nga kinahangean sa gihapon nga sundon ro mandu it Inter-Agency Task Force ukon IATF angot sa mandatory nga pagsuksok it face mask.
Mayoriya eon man sigon it publiko hay may bakuna mag-eowas sa pilang mga inunga.
Nagaeaum man si Toriano nga indi eon pagsundon ukon i-pattern it Pilipinas ro andang pagsabat sa covid-19 sa China.
Base suno kana sa anang na-obserbahan ko kasagsagan it pandemya, masyadong naging magastos ro gobyerno partikular sa pagpatigayon it mga lockdowns ag quarantine nga makabig nga oppressive.
Bukon it kapareho suno kana sa naging patakaran it western countries kamana man sa US nga ro andang gintutukan hay ro pagtau it assistance sa pamilya sa sangka baeay.
Sa pihak nga parte, gin-abiso man ni Toriano nga mag-doble dahan makaron nga nagabag-o-bag-o ro tiempo.
Dapat suno kana nga i-monitor ro ikamayad nga eawas bangud sa posibilidad nga magtaas eon man ro kaso it covid.
Kinahangean man suno kana nga tun-an eon it publiko nga magpangabuhi kaibahan ro covid ag trataron raya nga matsa sangka ordinary nga trangkaso eon lang bangud nga may nagakaigo eon nga proteksyon ro mga pumueuyu.
Samtang, mag-eowas sa pagtuhaw it mga sakit, dapat man sigon nga magdahan sa pagmaneho sa mga daeanon eabi eon kon mabaskog ro uean.
Nagakinahangean suno kana ro LGU-Kalibo it kapin sa P1 billion para sa maayos nga flood control program nga base sa Japanese system.
Raya hay bangud nga kinahangean eon suno kana nga iga-re-engineer ro drainage system ag ro re-routing sa pilang parte it Aklan river paagto sa mga dating suba nga makaron hay namaehan eon.
Plano man nanda nga bantayan ro mga lugar ukon karsadahon nga baeaha-on kon tiempo it tig-ueuean agud nga malikawan ro pagka-stranded it mga motorista.
