Kinahang-ean nga magpaidaeom sa nagkaeain-eain nga evaluation, validation ag eksaminasyon ro sangka media personnel antes nga mataw-an raya it nagakaigong dokumento para makahupot ag makadaea it armas sa guwa it andang panimaeay.
Suno kay Police Major Willian Aguirre it Provincial Intelligence Unit it Aklan Police Provincial Office, sa idaeom it Republic Act 10591 ukon Comprehensive Firearms and Ammunition, nakabaehag nga pwede magdaea it baril ro mga indibidwal nga may paeag sa kabuhi.
Angot kara, ginpabakod ro nasambit nga laye pinaagi man sa pagpirma ni Pangueong Rodrigo Duterte sa Republic Act 11766 kon siin kaibahan ro mga accredited media personnel sa mga ginapasugtan nga maghupot it armas apang dapat hay lisensyado raya.
Ginklaro dugang ni PMaj. Aguirre nga ro nasambit nga laye hay bukon it para magpasiga ro mga media practitioner kundi para eamang raya sa proteksyon sa kaugalingon engkaso nga may paeag sa kabuhi.
Kinahang-ean gihapon nga may disiplina sa kaugalingon ag maging responsable sa tanan nga bagay.
