May mga pagtuon nga nagahambae nga may maeain nga epekto sa mental health it sangka unga ro pirmeng paggamit it gadget ag nagkaeain-eain nga teknolohioya.
Suno kay Dr. Philip Ian Padilla, sangka health expert nga kumpara dati kat owa pa na-imbento ro mga gadgets ag ro modern technology hay physically active ro mga unga.
Base pa sa pagtuon nga ro maskin sang oras eamang nga paggamit it smartphone ukon tablet kada adlaw hay nagatuga raya it pagkabalisa ukon depression sa sangka unga.
Nagiging less curious, nabudlayan nga makatapos it sangka oeobrahon, nababawasan ro self control ag iba ro sangka unga pirmeng nagagamit it gadget.
Maskin nga mas mabahoe sigon ro epekto it mga gadgets sa teenagers, apang ro mga unga nga owa pa it napueong dag-on hay naaapektuhan man bangud nga imaw pa eamang naga-develop ro andang utok.
Mag-eowas nga maeanahon ro major depressive disorder, apang naga-contribute man kara ro bukon it balanse nga chemical sa utok tuga it paggamit it mga gadgets kamana man ro environmental factors, stress ag iba pa.
Mas madali man sigon nga tamaan it depression ro mga kababayen-an kaysa sa eaeaki bangud sa hormonal reason.
Sa pihak nga parte, ginpahayag ni Dr. Padilla nga pwede pa nga malikawan ro mental health problem nga daea it gadgets sa mga pamatan-on.
Nagapanguna kara ro pagbawas sa andang screen time ag dugangan ro iba pa nanda nga activities kapareho it pag-study, pakikipaghampang ag pag-istorya sa iba ag physical games.
Samtang, pila sigon sa mga senyales it depression hay ro kawad-an it gana sa mga bag-ong bagay, kabudlay sa pagtueog, pamatyagan nga owa it pueos ro pagpangabuhi ag ro grabe hay ro makaangkon it suicidal thoughts.
Madumduman nga ko Pebrero 11, ginpahayag ni Senador Robin Padilla sa Senate hearing nga ro mga pamatan-on makaron hay mahina.
Ginpamilit pa kara nga dapat nga usisaon ro epekto it sobrang paggamit it social media sa pamatan-on.
