KALIBO, Aklan—Ginasapinal eon makaron it Tourism Office it lokal nga gobyerno it Kalibo ro mga imbitadong performers nga magatanghal sa kalye kulinarya nga sambilog sa mga aktibidad nga ginpahaom para sa selebrasyon it kapyestahan ni San Juan de Bautista sa Hunyo 24, Biyernes nga adlaw.
Suno kay Maranatha Vargas, community affairs officer II it public affairs information and communication division it LGU Kalibo nga ro kalye kulinarya hay maga-umpisa sa Hunyo 21-23 sa may Martelino St. kon siin may mga banda ag artist nga imbitado bukon eamang it Akeanon performers kundi may magahalin sa syudad it Iloilo.
Mag-eowas kara, may street dance competition kon siin waeo ka mga partisipante ro nakataeana nga magaperform.
Samtang, may thanks giving mass man nga igapatigayon sa Kalibo cathedral sa kooperasyon gihapon it LGU Kalibo kamana man ro ginaabangan nga palaro ng lahi kon siin may nakataeana nga orok it baboy nga ginapaagaw sa mga partisipante.
Nasayuran nga haeos daywang dag-on nga nauntat ro aktibidad it LGU Kalibo sa selebrasyon it kpayestahan ni San Juan de Bautista bangud sa pandemya.
Angot kara, nagpadumdom si Vargas nga padayon nga sundon ro minimum health protocols apisar nga uwa eon it restriction ro banwa it Kalibo agud nga makalikaw sa virus daea it covid-19.
