KALIBO, Aklan–Haum eon ro tanan nga aktibidad para sa week-long celebration it Kalibo Sr. Sto. Niño Ati-atihan Festival 2023.
Suno kay Kagawad Mark Sy, tagapaghambae ni Mayor Juris Bautista Sucro nga naga-abot sa 60 hasta 70 ka mga tribo ag banda halin sa nagkaeain-eain nga kategorya ro magapasakop sa festival.
Hin-aga sigon hay may pagahiwaton nga final meeting ro Kalibo Ati-atihan Festival Board (KAFEB) para talakayon ro iba pang kinahang-eanon ag seguridad para sa kabilugan it selebrasyon.
Ro P1 million nga cash prize sigon hay haum eon ag maadto raya sa big tribal group.
Eauman suno kana nga maabu nga mga artista, rapper, banda ag K-Pop Star halin Korea nga makisadya sa okasyon.
Samtang, nagpadaea eon man sigon it mensahe ro opisina ni Senator Aimee Marcos apang owa pa it kumpirmasyon.
Pila sa mga pagaeauman nga paindis-indis it publiko hay ro Battle of the Band, dance contest, got talent, Miss Gay, car and motor show ag maabu nga iba pa.
Ginpasiguro man kara nga halin Lunes hay may pagaeauman nga artista ag palabas ro mga pumueoyo sa Magsaysay Park.
Samtang, sa Kapuso night sa Kalibo Pastrana Park hay may gina-ekspektar man nga ap-at ka mga artistang maga-abot ag sa Binibinig Kalibo Ati-atihan 2023.
Ginpahayag dugang nga nag-umpisa eon ro pila ka mga minor event ag religious activities it simbahan para sa ginakaeagkagan nga Mother of Philippine Festival.
