Nagapabilin nga blangko ro mga awtoridad kon sin-o ro sa likod it serye it online bomb threats sa pilang mga institusyon sa probinsiya it Aklan partikular ro mga campuses it Aklan State University.
Raya hay matapos ro pueong nga ginpatigayon it Aklan Police Provincial Office sa pamunuan it ASU.
Suno kay Dr. Jeffrey Clarin, ASU president nga hasta sa makaron hay nagapadayun ro imbestigasyon it kapulisan kabulig ro Regional Anti-Cybercrime Unit ukon RACU-6 agud nga mausoy kon sin-o ro responsable sa nagakatabu nga bomb threat.
Mag-eowas kara, may separado man nga tikang nga ginahimo si Kalibo Mayor Juris Sucro sa bulig it pilang mga eksperto agud nga ma-trace ro posibleng may mga kahimuan kara.
Dugang pa ni Dr. Clarin nga engkaso nga may mga mabahoe nga event ro unibersidad, ginpaabot it APPO nga mag-request kanda it assistance agud nga mausisa ro lugar pilang adlaw antes ro okasyon.
Nasayuran nga haeos tanan nga limang campuses it ASU hay nabulabog eon it bomb threat nga kaeabanan nga ginapaagi sa messenger.
Bangud nga indi ma-control ro social media eabi pa ag maabu ro mga naga-eagas nga maging viral ro content it mga vlogger rason nga madasig nga nagakalhit ro impormasyon .
