KALIBO, Aklan–Nagaeaum ro mga bolantero sa banwa it Kalibo nga makabawi sanda matapos ro masobra daywang dag-on nga pagka-tengga tuga it pandemya, makaron nga nagahilapit eon ro week-long celebration it 2023 Kalibo Sr. Sto. Niño Ati-atihan Festival.
Suno kay Ronald Lacar, sambilog sa nagabaligya it cellphone accessories sa gintukod nga stalls it lokal nga gobyerno nga ginaeauman eon nanda ro pagdagsa it maabu nga mga deboto ag turista para makisadya sa ginakaeagkagan nga Mother of All Philippine Festival.
Nag-umpisa sigon sanda sa pagplastar it andang mga baligya kato pang unang dominggo it Disyembre 2022.
Sa makaron hay sangkiri pa eamang ro naga-adto sa andang stalls kung igakumpara ko mga nagtaliwan nga dag-on.
Posible sigon nga nakakaapekto kara ro sigidas nga pagbuhos it uean ag krisis tuga it pandemya.
