KALIBO, Aklan—Gina-engganyo it barangay council it Andagao, Kalibo ro pamunuan it sangka pampublikong eskwelahan nga dapat nga mag-instrikto sa andang mga estudyante.
Raya ro ginpahayag ni Punong Barangay Juliet Melgarejo it Andagao, Kalibo kasunod it natabu nga pagpaeupok it baril it sangka menor de edad sa pilang mga estudyante nga gina-alegar nga anang naka-away, hapon it Miyerkules.
Suno kana nga bukon eon it manami ro nagakatabu nga maskin ro mga menor de edad hay nakakadaea it baril ag owa it kahadlok nga magpaeupok.
Base sa report it Kalibo Municipal Police Station, samtang nagapatigayon it film making ro grupo it mga estudyante para sa andang school project sa sangka lugar sa Ilang-Ilang St. sa nasambit nga barangay hay gulpi nga nag-abot ro mag-ama nga sakay it motorsiklo ag pagkatapos hay gina-alegar nga gindawat it ama ro daea nga baril sa anang unga nga ginasugid nga na-agrabyado sa inaway nga nag-euntad sa tunga it magtimbang nga parte.
Bangud sa kahadlok it mga estudyante hay nagdaeaeagan ro mga raya kadungan ro pag-eskapo it mag-ama paeayo sa lugar.
Presenteng nakakulong ro ama it binatilyo ag posibleng magapangatubang sa patong-patong nga reklamo.
Dugang pa ni kapitan Melgarejo nga dapat nga ipatawag it pamunuan it eskwelahan ro mga naeakot nga estudyante maskin pa nga ro insidente hay natabu sa guwa it school premises.
Samtang, kaibahan pa sa andang plano hay ro hugut nga pag-monitor sa pilang mga baraka sa guwa it eskwelahan nga gina-alegar nga nagapasugot sa mga minors nga mag-inuman sa sueod it andang establisimento.
Laygay man nana sa mga ginikanan nga bantayan it husto ro andang mga unga kaibahan ro pag-inspeksyon sa sueod it andang daea nga mga bag bangud nga sanda ro may responsibilidad sa menor-de-edad nanda nga mga unga.
Sa pihak nga parte, sangka ama man sigon ro nauna eon nga nagpaabot it reklamo sa andang barangay matapos nga gin-abangan ro anang unga tuga it gang war kun sa siin may kahigayunan nga pilang mga pamatan-on ro nagapang-gubat sa pilang estudyante it nasambit nga eskwelahan nga nagaresulta sa kinagamo.
