KALIBO, Aklan — Ginpasiguro ni Senador Cynthia Villar nga padayun nana nga pagatutukan ro mga problema ag isyu nga sab-eag sa pag-umwad it sektor it agrikultura ag mas pang nagapabudlay sa mga mangunguma ag mangingisda sa nasyon.
Sa anang pahayag sa sangka press conference sa sangka hotel sa isla it Boracay, ginpahayag ni Villar nga owa gina-apply ukon ginaturo sa mga mangunguma ag mga mangingisda nga una sa pinaka-pobre nga sektor ro mga research nga ginapatigayon rason nga naaywan sa tangkungan ro agrikultura kumpara sa mga kaiping nga nasyon sa Asya.
Kinahangean suno kana ro mas maeapad nga edukasyon ag training sa mga mangunguma, mangingisda kaibahan ro andang mga pamilya agud nga makabo-oe it kasayuran sa makabag-ong teknolohiya partikular sa operasyon ag maintenance it modern machineries nga importante sa pagtinguha it gobyerno sa farm mechanization .
Ginaeauman nga mas raya nga mapabaskog makaron pinaagi sa P10 bilyon nga bulig halin sa Rice Competitiveness Enhancement Fund ukon RCEF sa idaeum it Rice Tariffication Law.
