KALIBO, Aklan — Agaw-atensyon sa mga motorista ro ginpangtanum nga mga saging sa ginpangbungkal nga pilang section it national highway nga sakop it banwa it Nabas.
Bangud sa nasambit nga kondisyon it karsada nga ginpangbuhu-an, naka-disturbo raya sa mga motorista ag nagtuga it mahinay nga daeagan it trapiko.
Angot kara, ginpaathag ni Engr. Joey Ureta, head it maintenance section it Department of Public Works and Highways (DPWH) Aklan nga raya hay kaparte it andang road reblocking works sa mga karsadahon nga sakop it western side it probinsiya nga gin-umpisahan ko nagtaliwan nga dag-on.
Gindugang pa ni Engr Ureta nga indi eon masarangan it andang budget para sa maintenance ro mga lubak-lubak nga karsada rason nga kinahangean eon raya nga ipaidaeum sa rehabilitasyon.
Ro road reblocking hay magabuhay it 9 hasta 11 buean antes nga matapos.
Ro termino nga road reblocking suno kana hay ro repair nga ginapatigayon it andang ahensiya agud nga ayuson ro mga samad nga road sections.
Raya hay ginaeakipan it pagbo-oe sa mga luma nga concrete pavement ag ginabayluhan it bag-ong kongreto.
Kadungan kara, nagpangayo it pasaylo ro DPWH sa ginatuga nga inconvenience.
