KALIBO, Aklan—Tunga ro opinyon it mga konsehal sa banwa it Malay may kaangtanan sa planong pagpatindog it casino sa isla it Boracay.
Kun si Sangguniang Bayan member ag Committee on Tourism Chair Nenette Aguirre-Graf hay kontra sa nasambit nga proposisyon, pabor mat-a kara si SB member Dante Pagsuguiron.
Suno kay Pagsuguiron nga maskin nga sugae, apang legal ro operasyon.
Sa kamatuoran suno kana hay sambilog imaw sa mga nagtau it endorsement sa ap-at nga casino nga naga-operate sa isla nga makabig nga junket operation ukon pribado ro operasyon ag puro imbitado ro nagahampang nga mga foreign visa holder ag bawae ro local players.
Nakadugang man suno kana raya sa kita it banwa.
Madumduman nga ginpahayag it Macau casino operator nga Galaxy Entertainment Group Limited nga plano kara nga mag-invest it $500 million dollars agud nga magpatindog it casino-resort sa Boracay.
Sa pihak nga parte, gindugang pa ni pagsuguiron nga padayun ro paghueag it lokal nga gobyerno it Malay sa pagkontra sa Boracay Island Development Authority ukon BIDA bill.
Pabor sigon sanda sa regulatory policy apang bukon it sa idaeum it pagdumea sa Government Owned and Controlled Corporation ukon GOCC.
Engkasong maka-eusot ro BIDA-GOCC hasta sa senado, pwede pa sigon nanda raya nga kwestiyunon sa korte suprema.
