KALIBO, Aklan—Puro mga kristiyano eamang ro nagaselebrar it paskwa sa nasyong Pakistan.
Suno kay Bombo International Correspondent Rosana Bautista Ilyas nga raya hay bangud nga owa ginakilaea it mga Muslim ro Christmas, bag-ong dag-on ag birthday.
Majority it populasyon sa nasambit nga nasyon hay mga Muslim.
Matapos nga makapangasawa it Pakistani, nagpa-convert eon imaw sa Muslim.
Apang agud nga ipadumdum sa andang mga unga ro kulturang pinoy, nagahanda sanda maskin kompormi it pagkaon kada paskwa, bag-ong dag-on ag kaadlawan it anang mga unga.
Gindugang pa ni Ilyas nga sa pilang siyudad sa Pakistan nga maabu nga mga kristiyano nga naga-istar, partikular ro Filipino community hay nagapatigayon it saeo-saeo ag kasadyahan.
Naga-agto man sanda sa simbahan agud nga mag-attend it misa kada December 25.
Ginarespesto sigon it mga Muslim ro mga selebrasyon it kristiyano sa Pakistan.
Mag-eowas kara, may pilang mga establisimento ag kabaeayan man ro nagabutang it mga dekorasyon.
Ro mga kalye partikular sa Islamabad hay mahayag it mga christmas lights.
Importante man nga dekorasyon ro christmas tree ag belen kun sa siin kon amat hay nagapatigayon kara it contest.
Samtang, ro makabig sigon nga popular nga okasyon sa Pakistan hay ro Eid’l Fitr ukon Eid Mubarak.
Mas kilaea sa Pakistan ro santa claus bilang si father Christmas ukon Christmas Baba.
