KALIBO, Aklan—Dapat nga siguraduhon it mga Locally Stranded Individuals ukon LSIs nga kompleto ro andang mga daeang dokumento, sandig sa ginapangayo it Inter-Agency Task Force for the Management of Emerging Infectious Diseases ukon IATF-EID antes nga magbiyahe pauli it probinsiya.
Suno kay Ibajay mayor ag league of the municipalities of the Philippines ukon LMP-Aklan chapter president Joen Miraflores nga tatlong dokumento ro dapat nga daea it mga LSIs nga ginaeakipan it medical certificate, travel authority ag letter of acceptance halin sa natungdan nga mga LGUs.
Gindugang pa ni Mayor Miraflores nga ro kakueangan it maskin sambilog sa mga requirements hay posibleng maging rason it pagkadelay it pag-uli it mga LSIs.
Gindugang sigon nanda ro letter of acceptance halin sa LGUs agud nga makapahaum ro mga raya.
Engkaso nga indi makapasar sa guidelines ro baeay nga paga-ulian it LSI partikular ro pag-angkon it kaugalingon nga kwarto ag comfort room para sa anang home quarantine hay igabutang raya sa gintaeana nga ligtas covid center para sa 14 diyas nga quarantine.
Ginpamilit pa kara nga mas mayad nga makipag-angot anay ro mga maga-uli nga LSIs sa andang natungdan nga munisipyo agud nga makapahaum man sanda.
Sa makaron hay sigidas eon sigon ro pag-aeabutan it mga LSIs ag returning overseas Filipino workers bangud sa availability it mga eroplano ag barko.
Owa man suno kana it pagbag-o ro protocols sa mga ROFs.
Madumduman nga ko Hulyo 15 hay nagtapos eon ro daywang domingo nga moratorium sa pagpa-uli sa mga LSIs eabi eon sa Region 6.
