BALITA Espesyal– Sangka grupo it mga mangunguma sa Hokkaido, Japan ro nakahimo it bag-ong klase it prutas nga kapareho katam-is it melon apang may sangkiri nga aslum it lemon!
Suno sa horticulture company nga Suntory Flowers, limang dag-on nanda nga gintun-an ag gin-eksperimentuhan ro pinakabag-ong prutas nga andang naimbento, ro “Lemon Melon”.
Suno sa spokesperson it nasambit nga kompanya, ro Lemon Melon hay naghalin sa sangka variety it imported melon.
Pinaagi sa paghalo it lemon ag maid-id nga experiment sa cultivation methods ag harvesting time kara, nabilog nanda ro nasambit nga pinakabag-ong prutas.
Makaron nga 2023 ro pinakaunang kahigayunan nga naibaligya raya sa publiko.
Sa mga supermarket sa Hokkaido, raya hay nagabalor it 3,218 Yen (katumbas it P1,200) ro sambilog nga Lemon Melon.
Suno sa mga nakasamit kara, kasing agto it peras kon raya hay bag-ong harvest.
Balanse ro katam-is ag aslum kara ag bagay nga bagay makaron nga summer season sa Japan.
Kon masyado man raya nga euto, kapareho kahumok sa ordinaryong melon.
Mas nagapangibabaw ro katam-is kara ag sangkiri eamang ro aslum.
Masobra sa 3,800 Lemon Melon ro ginaeauman nga maibaligya sa mga supermarket sa Sapporo sa maabot nga Agosto.
