KALIBO, Aklan—Ginpakamayad it mga negosyante sa isla it Boracay nga magapabiling sarado ro andang mga negosyo sa tunga it nagapadayon nga pagpanaeasa it Coronavirus disease ukon Covid-19 pandemic.
Maskin nga ginbuksan eon sigon ro isla sa mga turista it Western Visayas hay bukon gihapon it bastante ro andang pagakitaon sa andang magiging gastos adlaw-adlaw partikular ro sweldo it mga trabahador.
Pila sa mga resorts ag hotels eamang ro nagbukas nga sanda ro nag-akomodar sa 81 mga turista nga nailista it Malay Municipal Tourism Office nga nagbisita sa isla halin ko June 16 hasta it 30, 2020.
Apang, inde sigon makasustiner sa industriya it turismo ro nasambit nga numero it mga lokal nga turista eabi eon makaron nga ginhugtan it uman it probinsya it Capiz ag Iloilo ro andang border nga sanda kunta ro ginakabig nga mabahoe nga market para sa uman nga pagbangon it Boracay.
Sa pihak kara, nakalista mat-a ro Municipal Tourism Office it 888 Aklanons ag 12,082 ka mga residente it Malay nga nagbisita sa isla halin kat ginbuksan raya sa mga lokal nga turista maskin nga nagapabilin pa sa modified general community quarantine ro bilog nga probinsya it Aklan.
Sa makaron hay 46 resorts and hotels eon ro nataw-an it Certificate of Authority to Operate (CAO) it Department of Tourism ag haom nga mag-akomodar it mga bakasyunista oras nga mabutang sa new normal ro status it Aklan ag mga kaeapit nga probinsya.
