Kalibo Aklan —– Mahagan-hagan ro kalisod nga ginabatyag makaron it mga Overseas Filipino Worker’s (OFW’s) sa Scotland, United Kingdom.
Raya hay matapos nga sigidas gihapon ro andang pagbaton it sweldo maskin nga haeos sang buean eon nga uwa it trabaho bangud nga sabat raya it gobyerno maskin 80 porsyento eamang halin sa kabilugan nandang sweldo.
Suno kay Bombo International Correspondent Annie Esparcia-Palian, tubong Brgy. Mataphao, New Washington apang presenteng nagatrabaho sa sangka hotel sa lugar nga halin kat ginlockdown it gobyerno ro nasyon hay nagsarado eon man ro mga establisyimento komersyal mag-eowas eon lang sa mga maeagkuang supermarkets ag pharmacy.
Suno kana, ro Scotland hay nakalista it 10,300 nga kaso it 2019 coronavirus disease (COVID-19) kon sa siin sa nasambitang numero hay 1,249 kara ro namatay.
Kaeabanan sigon nga nagkaeamatay hay halin sa mga homecare bangud nga sanda ro vulnerable sa nasambitang sakit maskin nga uwa pa ro mga raya nagguwa bangud sa local transmission nga ginatawag.
Suno pa kay Palian, nakakaguwa man sanda it baeay apang kinahang-ean nga magsuksok it facemask, gloves ag ipabilin ro physical distancing.
Samtang, ro mga ginakabig nga nakasueod sa poorest to the poor hay may mabaton nga 250 pounds ukon masobra sa 15,000 pesos halin sa gobyerno apang kinahang-ean nga i-apply raya it natungdan nga pamilya.
