KALIBO, Aklan—Ginpaabot ni Kalibo Sangguniang Bayan member Ronald Marte nga sangka resolusyon ro anang gindihon nga nagatuyo nga pabaskugon it uman ro pagbantay sa mga kabarangayan agud nga mapabilin ro andang drug-cleared status.
Raya hay kasunod it napabalita nga uman eon man nga nagbalik sa dating bisyo ag illegal nga hilimuon ro mga nakahilway pinaagi sa plea bargaining agreement ag mga nag-avail it community-based drug rehabilitation services for treatment it mga ginakabig nga PWUDS ukon persons who use drugs.
Tuyo sigon it anang resolusyon nga magiging dere-deretso ro adbokasiya sa mga barangay kontra sa iligal nga droga.
Dugang pa nga uman nga mapabaskog ro implementasyon it lokal nga gobyerno it Barangay Drug-Clearing Program bilang pagbuylog sa adbokasiyang wakasan ro pagkalhit it iligal nga droga.
Suno kay Marte nga importante ro papel it mga punong barangay bangud nga sanda ro eubus nga nakasayod sa mga nagakatabu ag nakakilaea sa mga aktibidad it andang nasakupan.
