KALIBO, Aklan—Kaabuan sa mga pamatan-on makaron nga tyempo hay makabig nga mahilig sa paghampang it mga online games partikular ro sikat nga Mobile Legends (ML).
Raya hay sambilog sa ginaka-uyaktan nanda it maabu nga oras ag interes.
Suno kay Johnmar Beltran, sangka Mobile Legends player nga maka-aeadik ro paghampang kara rason nga ginakinahang-ean ro grabeng disiplina sa kaugalingon.
Ro ML suno kana hay makabulig man sa paglikaw sa depression ag nagaserbing kalibangan it kapareho nana nga pamatan-on.
Apang, dapat sigon nga limitahan ro paghampang ukon paggamit it cellphone ag magkantigo it time management eabi eon kung nagatuon.
Bilang estudyante suno kana hay kinahang-ean nga balansehon ro oras it paghampang ag taw-an it mabahoe nga prayoridad ro mga leksyon sa eskwelahan.
Si Beltran hay masami nga naga-intra sa mga kompetisyon sa sueod ag guwa it probinsya it Aklan kaibahan ro anang mga barkada.
Ko kan-o eamang hay nag-kampeon sanda sa E-sport nga gin-organisa it lokal nga gobyerno it Kalibo.
Nag-umpisa sigon imaw nga maghampang it ML haeos ap-at nga dag-on eon ro nagtaliwan bangud sa impluwensya it anang mga amigo.
Bangud sa masako nga schedule, ginakinahang-ean sigon nana nga maglikaw anay sa paghampang it ML para mag-focus.
Si Beltran hay sangka 3rd year college student ag may kursong Bachelor of Science in Civil Engineering sa sangka pribadong eskwelahan sa banwa it Kalibo.
