Mas sangkiri eon ro mga Pilipinong nagapakasae, suno sa Commission on Population and Development (CPD), bangud sa epekto it kahimtangan nga pang-ekonomiya, nagabag-o nga panan-awan sa pamilya, ag pag-abu it mga alternatibong pamaagi it pag-iba.
Base sa datos it Philippine Statistics Authority (PSA), nagnaba it 13.5 porsiyento ro numero it rehistradong kasae sa nagtaliwa nga napueong dag-on halin sa 429,723 ko 2014 ag 371,825 ko 2024.
Suno sa CPD, mas gusto man it mga Pilipino nga “late” eon nga magpakasae. Ko 2024, naga-abot sa 30 anyos ro median age it mga eaeaking ginkasae ag 28 anyos man para sa mga babaye, mas mataas kumpara ko 2015.
Nagapabilin man nga pinakamaabu ro ginakasae sa edad nga 25 hasta 29. Nagapanguna ro Calabarzon sa may pinakamaabung nailistang kasae ko 2024, kasunod ro National Capital Region ag Central Luzon. Mas maabu sa gihapon ro civil weddings kaysa church weddings.
Kadungan it pagnaba it formal marriages, nailista man it CPD ro pagtaas it numero it mga Pilipinong una sa live-in ukon common-law arrangements. Suno sa ahensya, naka-apekto ro nasambit nga pagbag-o sa fertility, social protection, pabaeay, edukasyon, ag iba pang programa it gobyerno.
Nagpaandam man ro CPD sa padayun nga pag-angkon it child marriage, maskin nga naganaba eon ro kaso kara ag gin-insister ro importansiya it pagpatuman it Republic Act No. 11596 nga nagabawae sa nasambit nga hilimuon agud nga maprotektahan ro kamaeayran ag paeaabuton it mga pamatan-on.
