KALIBO, Aklan—Nagahilinugyaw makaron ro mga pumueoyo it France matapos nga nakasueod it uman sa finals it FIFA World Cup ro defending champion nga koponan.
Suno kay Bombo International Correspondent Ednita Russo, uwa it masudlan it kalipay ro mga taga-Pransya matapos pyerdihon it ranked number 4 naga France ro ranked 22 nga Morocco sa score nga 2-0 sa semifinals match nga ginpatigayon sa Al Bayt Stadium.
Raya eon ro pangaywang sunod nga dag-on nga nakasueod sa finals ro France kon sa siin naangkon nanda ro kampeonato ko 2018 FIFA World Cup nga ginpatigayon sa Russia.
Ginpahayag dugang ni Russo nga confident sanda nga makuhit ro back to back win kontra man sa mapag-on ag powerhouse team nga Argentina.
Uwa sigon it duda nga mabueo it uman it France ro tropeyo bangud nga ginpahauman nanda raya it husto.
Suno pa kana nga padayon nandang pagasuportahan ro bilog nga koponan hasta nga maangkon kara ro kadaeag-an sa raya nga dag-on it world cup tournament.
Engkaso nga magdaog hay matupungan eon nanda ro Brazil nga nakabueo it back-to-back World Cup titles nga natabo kato pang 1962.
Makaengkwentro it France ro Argentina sa Finals sa adlaw it Dominggo, Disyembre 18 it alas-11 it gabi-e samtang ro Morocco hay makasambuwa man ro Croatia para sa runner-up sa adlaw it Sabado Disyembre 17.
