KALIBO, Aklan—Nagapanawagan it bulig ag insigidang aksyon ro mga residente it Barangay Jumarap, Banga sa Department of Public Works and Highways ukon DPWH-Aklan ag mga mataas nga opisyal it banwa ag probinsiya may kaangtanan sa mabuhay eon nanda nga problema sa sigidas nga pagkatiphag it eugta maeapit sa suba it akean.
Suno kay kagawad Rolando Reyes nga sambilog imaw sa mga nagapangayo it bulig bangud nga ro anang baeay hay madali eon lang nga mahugos.
Ginasugid nga bangud ko owa it untat nga pag-inuean ko nagtaliwan nga mga inadlaw nga epekto it shearline hay naging madasig man ro pagkabkab it eugta kasunod it pagtaas it tubi-baha.
Nagaeaum sanda nga ma-repair ro revetment wall sa andang lugar agud nga mataw-an it pangmabuhayan nga proteksyon.
Ginatantiya nga haeos pitong metro eon lang ro kaeayuon antes nga matupas ro andang baeay kaibahan ro ap-at pa nanda nga kaeapitbaeay.
Gin-usoy man nana kon siin eon ro ginpromisang 8-milyon pesos nga gintaeana nga pondo para sa pagbutang it steel plate ag re-channelling it suba bilang temporaryong solusyon.
