KALIBO, Aklan—Ginapangamuyo it mga sidewalk vendors sa Kalibo municipal cemetery nga indi mag-uean agud nga mabawi ro gin-utang nga kapital it andang mga baligya.
Suno kay Gina Estelo it Brgy. Estancia, Kalibo nga kaeabanan nga mabaskog ro andang kita kon abu nga tawo ag manami ro paniempo.
Umpisa ko adlaw it Miyerkules nag-umpisa ro andang pagbaligya ag ginaeauman nga magatapos sa hapon it Sabado, Nobyembre 2.
Naging tradisyon eon sigon it andang pamilya ro pagbaligya sa lugar kada pista minatay nga gin-umpisahan it andang ina nga makaron hay maeuya eon.
Ko una hay puro kandila eamang ro andang baligya apang ko ulihi hay gindugangan nanda raya it mga softdrinks, bottled water, biscuit ag iba pa.
Komporme man lang sigon ro andang ginakita bangud nga maabu man ro andang mga kompetensiya .
Plano nanda nga aga-aga pa eamang hin-aga it biyernes hay magabutang eon sanda it andang tolda ukon trapal bangud sa ginaeauman nga pagdagsa it mga tawo sa nasambit nga sementeryo.
Engkaso nga indi maubos andang baligya hay igabalik sigon raya sa andang baraka sa andang baeay.
Kaibahan nana sa anang pwesto ro anang sambilog pa nga igmanghud nga nagabaligya it naka-arranged nga bueak.
