KALIBO, Aklan—Naga-abot eon sa haeos 100 ro numero it domestic tourist arrival sa isla it Boracay matapos ro uman nga pagbukas kara halin sa temporaryong pagpasarado sa sueod it haeos sang buean ko Agosto.
Sa datos it Malay Municipal Tourism Office (MTO) umpisa Setyembre 1 hasta 13, naga-abot sa 99 ro mga turistang nagbakasyon sa isla umpisa nga ginbalik ro Aklan sa General Community Quarantine (GCQ) ko Setyembre 8, 2021.
Kaabuan kara hay naghalin sa Western Visayas nga umabot sa 72 kun sa siin mayoriya kara hay naghalin sa aklan, samtang ro iba hay halin sa National Capital Region, Zamboanga del Sur, Batangas ag Cebu.
Nasayuran nga masobra sa 35,000 ro turista nga nagbisita sa Boracay ko buean it Hulyo.
Samtang, ginklaru ni Felix delos Santos Jr., Chief Tourism Operations Officer nga ro mga turistang nagahalin eamang sa mga lugar nga nakapaidaeum sa GCQ ag MGCQ ro pagabatunon.
Dugang pa kara nga owa man it ginbag-o sa mga requirements antes nga makasueod sa Boracay nga ginaeakipan it negative result it RT-PCR test, 72 oras antes ro pagbiyahe, proof of booking sa accredited hotels ag QR code.
Sa pihak nga parte, maskin nga ginaduso it mga negosyante sa Boracay nga makaangkon it separadong quarantine classification ro isla sa bilog nga mainland it Aklan, ginpahayag ni delos santos nga padayun sanda nga nagasunod sa desisyon it provincial inter-agency task force.
Nagaeaum si Delos Santos nga makabawi ro Boracay sa pag-umpisa makaron it “ber months” basta nga maga-dere-deretso eamang ro pagnaba it kaso it COVID-19 sa probinsiya.
Sa pihak nga parte, mabahoe ro andang pagpasaeamat sa provincial government sa pag-prayoridad kanda sa bakuna kontra COVID-19 agud nga maduso eon ro travel bubble sa mga international tourists.
