KALIBO, Aklan—Uman nga nagpadaea it sueat ro mga vendors it Kalibo public market ag sa ikaywang kahigayunan hay sa Sangguniang Bayan eon nanda raya ginpadaea agud nga matalakay eon ro andang reklamo kaangot sa mga nagsoeputan nga talipapa sa mga kabaryuhan it nasambit banwa.
Suno kay Arnel Meren, uwa gihapon it aksyon ro andang naunang sueat nga ginpadaea sa taeatapan it alkalde rason nga nagsueat sanda it uman agud nga mataeopangdan ro andang reklamo bangud nga sandang nagabayad it buwis hay uwa it ginakita bangud nga uwa eon it mga nagapanindahan sa public market.
Ginpahayag dugang ni Meren nga ro mga talipapa sa kabaryuhan hay una mismo sa mga pribado nga eogta.
Hugot man nanda nga ginapamaeabag ro plano it lokal nga gobyerno nga makaangkon it talipapa ro kada baryo it banwa.
Nauna kara, ginpahayag ni Municipal Economic Enterprise Development Office (MEEDO) Kalibo head Engr. Jessie Fegarido nga nagkasugot sigon ro natungdan nga mga punong barangays nga i-identified ro lugar nga pagabutangan it talipapa ag idto maga-ililiba ro mga manugbaligya.
Sa kamatuoran suno kana hay kinahang-ean it LGU ro revenue nga magasustiner sa krisis nga ginapangatubang tuga it pandemya rason nga kinahang-ean nga maging legal ro andang negosyo pinaagi sa pagbueo it permit.
