KALIBO, Aklan—Pilang adlaw eon lang antes ro Boracay reopening, nagpanawagan ro Public Employment Service Office (PESO) – Malay sa mga trabahador nga gustong magbalik sa isla nga siguraduhon nga nakarehistro ro andang pangaean.
Suno kay Jona Solano, Municipal Coordinator it PESO-Malay, ro mga workers hay may kaugalingon eon nga lane sa Caticlan Port ag sa Cagban Port sa Boracay kung siin igapaidaeom sanda sa screening it mga staff it PESO agud masigurong nakarehistro ro mga raya.
Katu pa eamang suno kana hay ginapa asikaso eon it andang taeatapan sa andang mga employer ro mga pangaean it andang mga employee ukon worker para sa pagrehistro sa PESO-Malay.
Maga-angkon eamang sigon it owa pagka-intindihan sa port kung owa sanda sa listahan.
Ginpahayag kara nga pagatawagan rayon nanda ro kompanya ukon establisyementong gina-ubrahan agud makumpirma.
Kung matabu nga owa sa listahan, paga usuyan sanda it certification of employment maghalin sa andang employer ag pabayron it P200.00 para sa occupational permit.
Nakabase sigon raya sa mga municipal ordinance agud makasueod ag makatrabaho sa Isla.
Ginklaro man kara nga ro gina require eamang nanda sa nakarehistro nga mga workers hay company ID ag certification it employer ag bukon eon it kinahang-ean ro voter’s ID ukon iba pang government ID.
