Ginaeauman it Department of Energy (DOE) nga makaangkon it magkahalong paghueag sa presyo it produktong petrolyo sa unang domingo it Hunyo.
Suno sa DOE-Oil Industry Management Bureau, base sa unang tatlong adlaw nga trading, ro presyo it gasolina hay magataas it 40 sentimos kada litro samtang ro kerosene hay maganaba it 28 sentimos kada litro ag ro diesel hay magasaka it 20 hasta 30 sentimos kada litro.
Apang bangud sa premium ag iba pang additional costs, ro adjustments hay posible pang magabag-o.
Ro ginaeauman nga pagtaas hay tuga it paeag it bag-ong US sanctions sa Russia ag padayun nga tensiyon sa mga nasyon nga naga-obra it langis.
Samtang, ro ginaeauman nga rollback hay bangud sa desisyon it OPEC+ nga dugangan ro produksyon sa Hulyo ag ro paghina it ekonomiya sa pilang nasyon sa Asya kapareho it India.
Iga-anunsyo it mga kompanya it langis ro opisyal nga hueag sa presyo kada Lunes ag igapatuman raya pagka-aga.
Sa pihak nga parte, makaangkon it rollback sa presyo it LPG sa June 1.
Suno kay Regasco President Arnel Ty nga base sa forecasts it ap-at nga international firms, ro estimated reduction hay P1/kilo hasta P4/kilo ukon P11 hasta P44 per 11-kilogram nga tangke.
Ginpahayag ni Ty nga ro pagnaba sa presyo it LPG hay tuga it manaba nga demand kada summer season.
Sa Pilipinas, kaeabanan nga nakakangkon it paghueag sa presyo it LPG sang beses sa sang buean ag ginapatuman kada unang adlaw it buean.
