Sangka residente it Barangay Caiyang, Batan ro nagpaabot it anang pagkabaeaka sa social media matapos nga makita ro sangka misteryosong eaeaki nga nakatindog sa may kusina it andang baeay.
Sa anang post sa social media, gin-abisuhan nana ro anang mga kasimaryo nga magpangaman ag magbantay sa posibilidad nga magbalik ro misteryosong eaeaki ag makatuga it kahalitan kanda./
Suno kay Arlyn Andaya, residente it nasambit nga lugar bandang alas-11:50 it gabi-i it Huwebes, samtang nagahana nga mag-ihi hay nakibot eon lang imaw kat makit-an ro sangka eaeaki nga nagatindog sa kilid it puno it niyog maeapit sa andang kusina.
Ginkutana sigon nana raya it makaywang beses, apang kat owa nagasabat ag nagatueok eamang kana hay dikara eon imaw ginkoebaan ag nagpangayo it bulig sa anang asawa.
Owa sigon raya it suksok nga pang-ibabaw ag naka-shorts it itom.
Samtang, bangud nga nakaangkon sanda it eye to eye contact hay naitsurahan nana ro eaeaki nga kapareho sa litrato nga naka-post sa facebook page it bombo radyo kalibo angot sa napabalitang missing person halin sa Brgy. Idiacacan, Pandan, Antique nga naduea kato pang Enero 20, 2026 ag may daea nga siyaw-duko.
Samtang, ginpahayag pa ni Andaya nga haum man kunta nana nga buligan ro eaeaki kon nakipag-istorya eamang kana bangud nga halata sigon sa anang itsura ro pagka-gutom, gaoy ag kawad-an it tueog bangud sa eus-ok nana nga mga mata.
Antes sigon nga nakapahayag it daea nga flashlight ro anang asawa hay gulping naduea ro eaeaki nga owa nanda napan-uhan kun sa siin maskin ro andang mga ayam hay owa naka-eahay.
Nauna eon nga gintugis ro misteryosong eaeaki sa Brgy. Jugas, New Washington ko nagtaliwan nga domingo.
Apang gin insister it nakakita nga residente nga owa kara nagakasinanto ro anang itsura sa napabalitang missing person.
