KALIBO, Aklan —- Arestado ro sangka miyembro it LGBT community kaibahan ro anang kakunstaba nga nagapangbiktima sigon it mga establisimento sa probinsiya it Aklan gamit ro “palit-pera” modus ag pagsalisi sa iba pang gamit.
Nakilaea ro suspek bilang si Bryan Villeza, 34, samtang ro driver it anang get-away vehicle nga motorsiklo hay si Michael Tipan, 35, parehong residente it Sampaloc, Manila.
Suno kay P/SSgt. Danilo Dalida, imbestigador it Banga Municipal Police Station nga matapos nga makabaton it report sa pag-atake it mga miyembro it salisi gang sa likod it Banga Public Market hay insigida sanda nga nagtukod it checkpoint rason nga nadakpan ro mga suspek sa Diversion Road sa parte it Barangay Mambog, Banga paagto kunta sa direksyon it banwa it Kalibo.
Ginklaru pa ni Dalida nga ro naaresto nga miyembro it LGBT hay iba sa bading nga naga-viral makaron nga video nga nagagamit it palit-pera modus.
Apang mabahoe ro andang pagpati nga magka-grupo ro mga raya bangud sa narekober nga cellphone kun sa siin makita ro andang pagbaeayluhan it mga mensahe.
Mag-eowas kara, sambilog eamang ro driver nga andang kaibahan bangud sa description nga ro ginamaneho nga motorsiklo hay kulay pink nga Mio.
Kasong theft ro ginpasaka kontra kay Villeza ag Tipan pinaagi sa inquest proceedings sa Aklan Prosecutors Office.
Sa pihak nga parte, gindugang pa ni Dalida nga ginkasa eon it mga kapulisan sa Aklan ro hot pursuit operation kontra sa suspek sa nag-viral nga video matapos nga makilaea ro anang pagkatawo.
Samtang, ginsaysay man sa Bombo Radyo it biktimang si Jaron Lachica nga samtang nagabantay sa baraka it anang hipag nga nag-CR hay nag-abot ro daywang suspek ag nagbakae, apang bangud nga owa nakasayod it presyo hay gintawag ag gin-agtunan nana ro hipag ag sa anang pagbalik hay owa eon ro anang gintungtong nga cellphone.
Mabahoe man ro anang pagpasaeamat sa madasig nga aksyon it Banga PNP.
