KALIBO, Aklan—Naabot eon it Isla it Boracay ro 1-million mark nga tourist arrivals umpisa Enero hasta Hulyo it makaron nga dag-on.
Suno kay Felix Delos Santos, Jr. chief tourism operations office it Malay Tourism Office nga eubus sanda nga nalipay matapos nga makalista it 1,032,143 nga turista mas mataas sa andang target nga 800,000.
Ginpahayag dugang nga maskin tiempo it habagat umpisa Hunyo ag Hulyo, nagapabilin nga mataas ro numero it mga naga-aeabutan nga local ag foreign visitors.
Naga-abot sigon sa 183,096 ro nailista nanda nga dumueuong ag lokal nga turista nga nagbisita sa isla sa buean eamang it Hulyo.
Kaabuan sa mga nagbisita hay domestic tourists nga may kabbilugan nga 160,259 samtang nag-abot sa 16,730 ro mga foreign visitors ag 6,107 ro Overseas Filipino Workers (OFWs).
Apang, kumpara ko Hunyo, mas mataas gihapon it 10,500 ro arrivals nga nakalista it 193,650 nga bisita.
Ko buean it Mayo, nag-abot sa 201,368 ro nagbisita sa nasambit nga beach resort.
Kumpiyansa sigon ro andang taeatapan ag ro lokal nga gobyermo it Malay ag Aklan nga mas pang maga-abu ro mga turistang magabisita sa Boracay hasta sa pagtapos it makaron nga dag-on, eabi pa ag dere-deretso ro pag-abot it direct international flights sa Kalibo International Airport halin sa Korea.
Sa pihak nga parte, nagpamalibad anay si Delos Santos nga mag-komento angot sa carrying capacity sa Boracay bangud nga subject pa sigon raya sa pag-review it Department of Tourism ag iba pang natungdan nga ahensiya it gobyerno.
