KALIBO, Aklan—Dismayado ro Natives of Boracay and Business Stakeholders, Inc. (NABBSI) sa plano ni Pangueong Rodrigo Duterte nga pagpatindog it casino sa isla it Boracay.
Suno kay Ms. Cris Cahilig, Vice President- Internal it NABBSI nga nadismaya sanda sa desisyon it presidente bangud kung paga-basehan sigon ro nauna kara nga ginpahayag kat ginpasarado ro Boracay ko 2018, owa imaw naila magpasueod it Philippine Offshore Gaming Operator (POGO).
Ro pagtukod sigon it casino sa isla hay makaapekto sa presenteng moratorium nga naga-regulate sa pagpatindog it imprastraktura bangud sa pagiging over-developed it Boracay.
Nasayuran nga planong ipatindog ro nasambit nga casino sa 23 ektarya nga eugta nga nahamtang sa Brgy. Manoc-manoc.
Nagapati man si Cahilig nga may kahilabtanan sa ginaduso nga Boracay Island Development Authority (BIDA) bill sa idaeum it pagdumaea it sangka Government-Owned and Controlled Corporations (GOCC) ro nasambit nga desisyon it pangueo.
Ro NABBSI hay sangka organisasyon nga pormal nga gintukod ko Nobyermbre 2020 ag ginabilog it mga indibidwal nga nagapanag-iya it eugta sa Boracay.
