KALIBO, Aklan—Nag-abot sa 71 ro mga nag-eabag sa minimum health protocol ag curfew sa isla it Boracay sa sueod eamang it sang adlaw ko Nobyembre 1 kadungan it pagbuhos it mga bisita.
Sa record it Malay Municipal Tourism Office, umpisa alas-12 it tungang gabi-i hasta alas-2 it aga-aga natigayon nga maaresto ro nasambit nga mga indibidwal nga kaabuan hay mga turista nga nag-eabag sa Municipal Ordinance No. 453 S-2021 ukon mas kilaea sa tawag nga COVID-19 Prevention and Control Ordinance partikular ro Section 9 ukon hugut nga pagpatuman it Curfew Hours, Liquor Ban ag Mass Gathering.
Sa nasambit nga numero, 36 ro nadakpan sa parte it Balabag, 13 sa Manocmanoc , 12 sa yapak ag 10 ro naaresto it mga katapo it Malay Headquarters.
Gin-isyuhan ro mga raya it citation ticket nga may multang 2,500 pesos.
Nauna eon nga ginmandu ni P/Lt. Col Don Dicksie De Dios , hepe it Malay Municipal Police Station ro mas hugut nga pagpatuman it curfew sa isla umpisa alas-12 it tungang gabi-i hasta alas-4 it aga-aga.
Nasayuran nga ro curfew sa mainland malay hay nagapabilin sa alas-9 it gabi-i hasta alas-4 it aga-aga.
Ginpahayag ni De Dios nga kaeabanan sa mga gina-eabag hay ro curfew ag owa pagsuksok it face mask.
Importante suno kana nga masiguro nga ro mga turista nga nagabisita sa isla kamana man ro mga trabahador ag residente hay protektado ag eowas kontra sa makamaeatay nga COVID–19.
