KALIBO, Aklan—Nag-umpisa eon nga magbaligya ro mga negosyante it paeupok sa banwa it Balete.
Suno kay FO2 Carlo Masagnay, tagapaghambae it Bureau of Fire Protection ukon BFP-Balete nga nagpatuman eon sanda it massive inspection sa gintaeana nga lugar sa may barangay Feliciano agud nga masiguro nga ginasunod ro mga sueundanan angot sa pagbaligya it paeupok kamana man ro pagbantay kon may ginapaeusot nga mga iligal nga paeupok.
Daywang negosyante eamang suno kana ro nataw-an it permit it andang taeatapan agud nga magbaligya it firecracker ag pyrotechnique.
Samtang, uman nga ginpadumdum ni FO2 Masagnay ro publiko nga likawan ro paggamit it mga paeupok ag pirmeng isipon ro kaeowasan it pamilya.
Kaeabanan suno kana nga sa public plaza ro ginataeana nga fire cracker zone it andang LGU.
Ro banwa it Balete hay nakalista it ap-at nga sunog sa bilog nga dag-on 2022 nga puro tanan residential ag aksidente ro ginhalinan.
