KALIBO, Aklan—Naputos it grabeng kasubo makaron ro Thailand kasunod it makangieidlis nga krimen nga ginkamatay it 38 nga katawo kaibahan ro 24 nga mga unga.
Suno kay Bombo International Correspondent Michael Garulacan nga maabu nga mga Thais ag maskin sanda nga mga Pinoy ro haeos indi makapati sa natabu.
Raya hay kasunod it pagsalakay it sangka dating pulis sa sangka child care center sa Thailand gamit ro kutsilyo ag baril.
Bandang alas-12:30 it udtro adlaw natabu ro insidente kahapon it Huwebes sa Na Klang District it Nong Bua Lam Phu, Northeastern Thailand.
Ro suspek nga si Panya Kamrab, 34-anyos, dating miyembro it police force hay ginasugid nga na-dismiss sa anang puwesto ko nagtaliwan nga dag-on bangud sa mga alegasyon sa droga ag presenteng ginapamatian ro anang kaso sa korte.
Suno kay Garulacan nga base sa mga report, halin ro suspek sa korte kahapon sa pagbisita sa anang kaso ag pagkatapos hay nag-agto imaw sa Utai Sawan Child Development Center agud nga sueangon ro anang unga nga eaeaki, apang owa eon idtu ro anang unga.
Bangud kara, gulpi eamang nga nagpamaril ag nagpangbuno ro suspek gamit ro sangka meat chopper, ag pilit nga ginsueod ro naka-locked nga kwarto kun sa siin idtu ro mga unga para sa andang nap time.
Ginpatay sigon it suspek ro mga unga nga naga-edad it daywa hasta limang dag-on pinaagi sa meat chopper ag baril.
Sangka manugturo nga nabdos it waeong buean ro ginbuno man it suspek hasta nga mamatay.
Samtang nagapaeagiw hay nakapatay pa it sangka pulis ro suspek antes nga eubusan nga nagsakay sa anang puti nga pick-up truck, kun sa siin 12 nga katawo pa ro anang naninahan matapos nana nga ligsa-on.
Dugang pa ni Garulacan nga nagderetso sa andang baeay ro suspek ag pag abot hay pinatay man nana pinaagi sa pagbaril ro anang asawa ag unga antes nga nagbaril sa anang kaugalingon.
Ginapatihan nga bangud sa nagpatong-patong nga problema hay nahimo ro krimen.
Nagpahayag eon man sigon it anang pakikisimpatiya ro Prime Minister it Thailand ag nakataeana nga bisitahon ro probinsiya sa Northeastern Thailand.
Sa pihak nga parte, ginpahayag dugang nga ginkumpirma it Philippine Ambassador sa Thailand nga owa it nadaeahig nga Pilipino sa nasambit nga insidente.
