Kalibo Aklan —– Bangud sa kaabtik it gobyerno it Kingdom of Bahrain, nagapabilin sa waeo ro namatay tuga it 2019 coronavirus disease (COVID-19) halin sa 2,217 nga infected it virus samtang 1,082 ro nagmayad matapos ro pagbueong ag quarantine procedure.
Suno kay Bombo International Correspondent Michelle Romaquin it Adliya Kingdom of Bahrain, insigidang naghueag ro andang gobyerno kat napabalitang nagkalhit eon ro sakit sa nagkaeain-eain nga nasyon.
Kaangot kara, ginlockdown sigon ro mga maeagkong syudad agud nga malikawan ro pagtieilipon it mga tawo para matapna gilayon ro COVID-19.
Nagsarado ro ibang establisiyemento ag kumpanya apang padayon ro andang sweldo kon sa siin 25 porsyento ro andang mabaton maskin nga uwa eon sanda nagasueod.
Ginpahayag dugang ni Romaquin nga sa oras it krisis hay naga-iral ro bayanihan system sa mga pinoy kon sa siin ro mga owa it trabaho hay ginasuportahan it Filipino Community ag iba pang organsisyon it pagkaon ag iba pang kinahang-eanon para eamang mabuhi sa tyempo it pandemya.
Ro iba sigon hay nakabaton eon it 200 dollars halin sa gobyerno bilang ayuda sa mga nawad-an it trabaho ag sa mga uwa eon it makaon.
Sa makaron sigon hay bukon pa it masyadong haeoga ro gobyerno sa mga sueondanan nga ginapatuman apang mahambae sigon nga may kahilwayan sanda ag nababawasan eon ro kahadlok nga matamaan it makamaeatay nga sakit bangud nga nakontrol eon it andang gobyerno ro pandemya.
