KALIBO, Aklan — Owa nagapakita it kaakig ro mga Kuwaiti sa mga Filipino sa nasambit nga nasyon ag nagapabilin nga normal ro andang pagpangabuhi idtu .
Raya ro ginpahayag ni Bombo International News Correspondent Dennis Nama-Rata sa Kuwait.
Raya hay matapos ro magkasunod nga makangieidlis nga balita kun sa siin ro una hay sangka overseas Filipino worker nga pumatay sa 18 months old nga eapsag it anang employer pinaagi sa pagsueod kara sa washing machine ag ro ikaywa hay ro nakit-an nga nagaka-agnas nga bangkay it sambilog pang OFW sa likod it baeay it anang amo.
Makasueubo suno kana ro hitabu bangud nga bag-o eamang nga ginduea ro deployment ban para sa mga Pinoy workers sa Kuwait.
Dugang pa ni Rata nga nagapadayun ro imbestigasyon it gobyerno it Kuwait sa nasambit nga mga insidente kamana man nga owa nagapabaya ro Philippine government sa pagtau it kinahangeanon nga bulig it mga eakot nga OFW.
Samtang, ginsaysay kara nga ro OFW nga si Dafnie Nacalaban hay daywang buean eon nga owa it contact sa anang pamilya kun sa siin andang ginbalewala bangud sa anang promisa nga sorpresa nga maga-uli sa Pilipinas ko Disyembre.
Nadiskubre sigon ro anang bangkay matapos nga makonsensiya ro igmanghud it suspek nga nakasaksi sa krimen ag nagsugid sa mga kapulisan.
Insigida sigon nga naghueag ro mga awtoridad ag gin-aresto ro suspek nga dati eon man nga may criminal record kaibahan ro anang misis ag sambilog pang kasambahay nga sangka Asyano man.
Ginadudahan nga ginplano it anang amo nga itago ro krimen.
Ginasugid nga nakaangkon it away ro OFW ag ro anang amo rason nga ginbugbog imaw .
Sa pag-uli it anang employer hay nakita eon lang ro biktima nga owa eon it kabuhi rason nga gin-eubong raya sa likod it baeay kaibahan ro mga kakuntsaba sa krimen .
Nasayuran nga haeos tatlong dag-on eon nga nagatrabaho ro OFW sa anang employer.
