KALIBO, Aklan—Ginklaru it Civil Aviation Authority of the Philippines (CAAP)-Aklan nga nagapabilin nga oswa pa nagbalik ro operasyon it commercial flights sa Caticlan Airport ag Kalibo International Airport.
Suno kay Engr. Eusebio Monserate Jr. , CAAP-Aklan head nga umpisa ko hunyo 2 hay nagpaguwa eon it abiso ro pilang airline company nga nagabaligya eon sanda it plane ticket maskin nga owa pa it approval halin sa lokal nga gobyerno it aklan ro pagbukas it paeuparan.
Bangud kara, ginlaygayan ni engr. monserate ro publiko nga antes nga magbakae it ticket hay i-double check anay raya sa mga kompaniya it airline.
Sa pihak kara, nakaplastar eon ro mga tikang it CAAP kontra COVID-19 bilang pagpahaum engkaso nga magbalik ro andang operasyon.
Bangud nga ginbawasan ro oras it operasyon it paeuparann halin sa 24 oras sa 12 oras, ginbawasan man sigon nanda ro andang tawuhan sa 50% bilang pagsunod sa skeleton workforce arrangments, kun sa siin , kaeabanan sa mga personnel nga naga report hay mga nagatrababo sa tower, security, community cleaners ag iba pa.
Nataw-an man suno kana sanda it kahigayunan nga ma-repair ro andang parking bay.
Nasayuran nga may nakabutang nga mga marker sa pagsueod pa eamang sa departure area hasta sa check-in counter area it paeuparan.
Raya hay agud nga masunod it maayos it mga pasahero ro physical distancing sa tunga it padayun nga paeag it coronavirus disease.
May mga marker man sa mga baggage conveyor area sa arrival hall it paeuparan para mapabilin ro sangka metrong distansya sa mga pasahero.
Gindugang pa ni engr. monserate nga sa makaron hay owa sanda nagabaton it repatriation flights kundi nga puro mga government-facilitated flights ag cargo delivery it mga medical supplies eang ro ginapasugtan sa paeuparan.
