KALIBO, Aklan—Ginaduso it sangguniang bayan it Malay nga obrahon nga legal ro operasyon it habal-habal sa isla it Boracay agud nga mataw-an it trabaho ro mga pigado nga pamilya sa isla.
Suno kay SB member Alan Palma Sr. ro hagna hay may titulo nga “an ordinance regulating the operation of single motor bike in Boracay as a common service carrier by providing livelihood programs and activities to an indigent family.”
Si Palma hay sambilog sa co-author it hagna nga gindihon ni SB member Dante Pagsuguiron, kun sa siin nakataeanang pagatalakayon sa ikaywang pagbasa.
Tiempo eon suno kana nga makaangkon it alternatibong transportasyon ag dapat nga ikonsidera kara ro habal-habal operations.
Dugang pa nga may mga lugar nga indi maabot it e-bike ag Boracay land transport multi purpose cooperative nga masarangan nga sudlon it mga motorbike.
Mag-eowas kara, bilang preparasyon raya engkaso nga makaangkon it krisis sa kuryente ukon kalamidad.
Kaibahan sa andang plano hay ro pag-organisa it grupo it motorbike owners sa isla ag magtukod it sangka organisasyon ukon kooperatiba.
Nasayuran nga maskin nga bawae hay may naga-operate gihapon nga habal-habal sa isla partikular sa gabi-i.
Sa pihak nga parte, pagatun-an sigon nanda ro nagakaigo nga laye ag ro mga best practices it angkas ag iba pang service provider sa metro manila nga pwedeng ma- adopt partikular sa safety and protection bukon eamang it mga drivers kundi it mga pasahero kara.
