KALIBO, Aklan—Nagapadayon makaron ro ginapatigayon nga pag-monitor it Office of the Provincial Veterinarian Office (OPVET) sa tanan nga mga slaughterhouses sa bilog nga probinsiya it Aklan.
Sa interview it Bombo Radyo Kalibo kay Grant Tarantan, Livestock Inspector 1 it OPVET – Aklan, ginpahayag kara nga natapos eon nanda nga ma-monitor ro bahin it Eastern side it probinsiya.
Madason nanda nga paga-adtunan hay ro bahin man it western side it probinsiya agod nga masayuran kung nagasunod sa mga sueondanan ro tanan nga mga slaughter houses sa Aklan.
Ginpahayag-dugang ni Tarantan nga quarterly hay nagapatigayon sanda it monitoring depende sa andang schedule.
Ginpabutyag man kara nga sa andang pagmonitor, nagatao sanda it mga rekomendasyon sa mga slaughter houses it mga kabanwahanan para sa iga-improbar kara.
Sambilog sa mga gina-rekomendar nanda ro pag-angkon it lamesa nga idto dapat nga magkatay.
Pinaagi kara, indi eon magkatay ro mga matansador sa saeog nga kaeabanan nanda nga gina-ubra.
Raya hay agod nga malikawan nga mag-angkon it kontaminasyon ro karne samtang una pa eamang sa matansahan.
Gina-rekomendar dugang it taeatapan nga siguraduhon man nga malimpyo ro mga drainages kung siin naga-agi ro higku maghalin sa mga slaughter house.
