Ginpamalibaran it tag-iya it Ostrich farm nga nahamtang sa Brgy. Tigayon, Kalibo ro alegasyon it sangka social media user nga nagpost it mga litrato ag video it mga sapat nga ginaalegar nga mga maniwang sigon ag uwa naalagaan it husto base sa andang hitsura ag eawas it mga sapat.
Suno kay Ramon Deo, bukon sigon it minatuod ro alegasyon ag posibleng pagpanamad eamang raya sa andang farm bangud nga bukon man nana it kilaea ro ginapahayag nga may concern sigon sa mga sapat.
Bangud kara, desidido imaw nga pasakaan it kaso ro nasambit nga social media user sa oras nga inde raya makipag-angot kanda ag makipag-istorya it husto.
Sa kamatuoran suno pa kay Deo hay may residence veterinarian sanda nga nagasikyar sa kondisyon it mga sapat ag bukon it hangae ro pag-alaga sa mga raya eabi eon ag personal nana nga kwarta ro ginagastos.
Kon saligan suno kana ro kita it farm halin sa entrance fee it mga bisita hay kueang gid raya nga mayad sa pang-adlaw-adlaw nga pagkaon it mga sapat ag sa maintenance it pasilidad.
Ro pahayag ni Deo hay kasunod it anang ginpatawag nga press conference agud nga mataw-an it kaklaruhan ro tanan bangud sa nagkalhit eon sa social media ro nasambit nga post nga posibleng makatao it maeain nga impresyon sa andang farm.
