KALIBO, Aklan—Owa it nakikita nga maeain ro pilang mga residente sa ginaproponer nga obrahon nga China inspired nga lugar ro Rizal Street sa banwa it Kalibo.
Raya hay may kaangtanan sa aprubadong resolusyon nga gindihon ni Vice Mayor Cynthia Dela Cruz nga tun-an ro posibilidad nga obrahon nga matsa China town ro lugar nga pagapatindugan it mga baealigyaan it Chinese products.
Nagapati si Ramon Quimpo, sambilog sa mga mabuhay eon nga residente sa kalye Rizal nga tama eang nga uman nga mabuhi ro pag-negosyo sa lugar nga dating gina-domina it mga negosyanteng Filipino-Chinese.
Suno kay Quimpo nga pabor imaw nga uman nga mapa-improve ro kalye, apang indi dapat nga bayluhan ro anang pangaean bilang pag-respeto sa ginakabig nga national hero nga si Dr. Jose Rizal, kun sa siin ginsunod ro pangaean.
May mabahoe suno kana nga kontribusyon sa kasaysayan it banwa ro Rizal Street bangud nga dati raya nga sentro it komersiya.
Apang kat nakaangkon it mabahoe nga sunog ko 1956 hay nagkaealhit eon ro mga Filipino-Chinese sa nagkaeain-eain nga lugar it Kalibo.
Nasayuran nga dating ginatawag ro lugar nga escolta bangud nga business district raya it old Kalibo.
Nagaeaum si Quimpo nga makaangkon raya it ordinansa bangud nga pabor imaw sa nasambit nga proposisyon.
