KALIBO, Aklan–Naga-abot sa P3.8 million ro haeaga it tanan it prizes sa nagkaeain-eain nga kategorya it tribal ag individual competition it kakatapos eamang nga week-long celebration it Kalibo Sr. Sto. Niño Ati-atihan Festival 2023.
Suno kay Vice Mayor Dr. Cynthia Dela Cruz nga kabilugan nga naging madinaeag-on ag matawhay ro selebrasyon.
Eubos sigon ro kalipay it lokal nga gobyerno bangud nagbunga ro tanan nga paghimakas ag pagtinguha it kada isaea para ipabilin ro katawhayan ag kalinong sa ginakaeagkagan nga Mother of All Philippine Festivals.
Ginpasaeamatan man kara ro tanan nga nagbulig eabi eon ro mga uniformed personnel, Diocese of Kalibo ag volunteer groups kung siin naging strikto ag efficient ro andang pagbantay para masiguro ro seguridad it mga deboto ag turista.
Nakataeana sigon nga magpatigayun it pueong ro Kalibo Ati-atihan Festival Board (KAFEB) makaron nga dominggo para maistoryahan ro naging assessment sa selebrasyon.
Bukas man sigon sanda sa mga suhestiyon angot sa dapat pang ayuson ukon ubrahon agud nga mas pang mapanami ro preparasyon sa mga masunod nga dag-on.
