KALIBO, Aklan – Nagpagowa it P50,000 nga pabuya rolokal nga gobyerno it Libacao, Aklan para sa sin-o man nga makatao it lead sa suspect sa brutal nga pagpatay sa sangka 8-anyos nnga unga nga si Chrisha Nobleza sa Sitio Aglanka, Brgy. Guadalupe, Libacao.
Suno kay Libacao Mayor Charito Navarosa, tinotuyo kara nga insigidang maaresto ro nasambitang suspek.
Nasayuran nga nagtao eonman it dugang nga P10,000 si Konsehal Juris Sucro it LGU-Kalibo para kara.
Madumduman nga ap-at nga adlaw nga naduea ro unga antes nga makita nga naga kaagnas eon ro bangkay kara.
Nasayuran nga matapos gin himuslan, gin pugutan ag gin chop-chop pa ro waeang alima kara ag gin hana pang sunugon.
Pilang metro eamang ro distansiya sa hubeas nga eawas it unga hay nakita man ro pugot nga ueo ag alima kara kamana man ro pilang tueo it dugo, eambong ag underwear it biktima.
Samtang, naging emosyunal ro ama it unga nga si Eriel Nobleza sa makangieidlis nga gin dangatan it anang unga nga gin eabo it owa pa nakilaeang suspect.
Ro biktima hay sangka Grade 3 pupil ag residente itBrgy. Julita, Libacao, hay ulihing nakitang buhi ku adlaw it Martes samtang naga bulig sa anang ama sa pag-ani it mani apang, gin sugo nga mag uli anay agud mag eaha ag magbakae it sigarilyo apang, owa eon nakabalik.
