KALIBO, Aklan—Pabor ro sangka public health expert sa suhestiyon nga tun-an it uman ro paggamit it dengvaxia vaccines sa Pilipinas.
Suno kay Dr. Philip Ian Padilla, public health expert it University of the Philippines ukon UP-Visayas nga mabahoe ro maibulig it bakuna sa tunga it nagatinaas nga kaso it dengue sa nasyon kun sa siin nag-abot eon sa 90% ro nailista sa unang parte it makaron nga dag-on kumpara ko 2021.
Suno kay Dr. Padilla nga suspendido makaron ro paggamit it dengvaxia vaccines sa nasyon matapos nga ginkansela ro anang certificate of product registration tuga it pilang mga kontrobersiya nga ginaeakutan kara ag nahaluan pa it pulitika.
Apang suno kana nga naging epekto ro paggamit kara sa ibang mga nasyon kapareho it Singapore, Malaysia, Thailand, ag Indonesia kun sa siin nalikawan ro pag-grabe it kaso it dengue ag numero it mga pasyente nga ginadaea sa ospital.
Ro bakuna suno kana hay aplikable eamang sa mga naga-edad it 9 hasta 16 anyos ag dapat nga ro maturukan hay nagka-dengue eon.
Makaangkon sigon it kumplikasyon kon nabakunahan ro sangka owa pa nagka-dengue.
Kinahangean sigon nga ma-screen anay ro mga pagabakunahan agud nga matumod kon nagka-dengue eon ukon owa.
