KALIBO, Aklan–Nag-umpisa eon makaron nga adlaw, Mayo 30 ro pag-proseso it Department of Foreign Affairs ukon DFA Manila sa dokumento it mga nagpa-pre-register sa passport on wheels nga haead it lokal nga gobyerno it Kalibo.
Suno kay John Marden Maigue, manager it Public Employment Services Office ukon PESO-Kalibo, dapat nga sundon ro confirmed appointment nga gintaeana kanda pinaagi sa nabaton nga text message ukon e-mail.
Agud nga dere-deretso ro pag proseso, dapat sigon nga pahaumon ro tanan nga mga requirements kapareho it resibo it pagbayad, application form ag appointment details, kamana man ro original ag photo copy it mga supporting documents kapareho it lumang passport kon naga renew , valid ID nga ginabaton it DFA ag PSA birth certificate ag marriage contract it mga nagapa-change status ag nagapabaylo it surname.
Magabuhay eamang sigon raya it tatlong adlaw hasta sa Hunyo 1.
Mabahoe nga bulig sigon raya sa mga kalibonhon partikular sa mga first time nga magbueo it passport ag sa mga naga-renew it nasambit nga dokumento.
Samtang, nagsobra sa andang gintaeana nga target nga 1,800 slots ro nagpa-pre-register rason nga makaron hay maabu pa ro una sa waiting lists ag nagahueat pa sanda it go signal halin sa DFA kon dugangan ro nasambit nga numero.
Mag-eowas sa taga-banwa it Kalibo hay nagbukas man sigon sanda it pilang slots halin sa ibang banwa.
Dugang pa kara nga raya hay first come first serve basis kon siin nag-umpisa ro pre-registration ko Mayo 17 ag nagtapos ko Mayo 20.
