Pagahinyu-on it Food and Drug Administration (FDA) sa lokal nga gobyerno nga maghimo it ordinansa sa pagbawae it pagbaligya it bueong sa mga sari-sari store.
Suno sa FDA, raya hay agud nga malikawan ro pagbaligya it mga pekeng bueong nga pwedeng magtuga it peligro sa ikamayad nga eawas it mga consumer.
Ginpaabot ro nasambit nga proposisyon ni FDA Deputy General Oscar Gutierrez, kay President Rodrigo Duterte sa “Talk to the People” briefing ko Lunes.
Punto ni Gutierrez, ro lokal nga gobyerno ro naga-isyu it license to operate sa mga sari-sari stores.
Kadungan kara, gin engganyo nana ro mga Filipino nga magbakae eamang it bueong sa mga FDA-licensed drug stores nga may 45,000 sa bilog nga nasyon.
Ginreport man it FDA nga may 185 sari-sari stores nga gina-imbestigahan it FDA , 78 kara hay natukiban nga nag-eabag sa Pharmacy Act.
Sa 78, siyam ro nasayuran nga nagabaligya it peke nga bueong.
Kabilugan nga 13 nga pekeng bueong man ro natukiban it kaabuan nga COVID-related.
Nakipag angot man ro FDA sa mga online shopping sites agud nga matumod ro mga pageabag sa pagbaligya it mga pekeng bueong gamit ro mga platform.
Sa parte man ni Interior Secretary Eduardo Ano, magapaguwa imaw it memorandum circular “agud nga ro kampanya kontra sa pagbaligya it mga pekeng bueong hay mapundo hasta sa lebel it sari-sari stores.
Makabig sigon raya nga peligroso sa ikamayad nga eawas .
