Ginpabutyag ni dating Sangguniang Panlalawigan member ag political analysts sa Aklan nga si Atty. Harry Sucgang nga mabuhay eon nanda nga ginaeauman nga mabasura ro mga kaso angot sa droga kontra kay dating senador Leila de Lima.
Suno kana nga raya hay bangud nga puro mahina ro mga ebidensiya.
Malipayon sigon imaw sa nasambit nga development bangud nga nag-antus man imaw it mabuhay nga tiempo sa sueod it presuhan ag naging makaeoeo-oy ro anang kahimtangan.
Ro tatlong kaso sigon it droga hay mabuhay eon nga ginbatikos ni De Lima bangud nga sayud nana nga mga himo-himo raya kontra kana ag owa man imaw it mahimo kato bangud sa poder ro anang mortal nga kaaway nga si dating pangueong Rodrigo Duterte.
Nasayuran nga ro kaso hay ginpasaka sa idaeum it pagdumaea ni DOJ Sec. Vitaliano Aguirre.
Madumduman nga ko Lunes, ginpasugtan it korte it Muntinlupa ro demurrer ni De Lima sa ebidensiya, nga epektibong nabasura ro ikatlo ag ulihing drug case nga ginpasaka kontra sa dating senador.
Nakahilway sa piyansa ro dating senador ko Nobyembre 2023 matapos makulong sa Camp Crame umpisa ko Pebrero 2017 bangud sa mga alegasyon sa droga.
Una imaw nga naabswelto sa kaso ko Pebrero 2021 sa Muntinlupa City RTC Branch 205 ag ko Mayo 2023, gin abswelto man it Muntinlupa RTC Branch 204 sanday De Lima ag Ronnie Dayan, ro anang kaparehong akusado ag dating bodyguard, sa kasong illegal drug trading sa basehan nga reasonable doubt.
Ginbasura man it korte sa Quezon City ro daywang kaso it pag-eabag ni De Lima.
Dugang pa ni Atty Sucgang agud nga panigurado nga mapasabat si Duterte sa anang mga saea eabi eon sa pag-eabag sa human rights, pagahueaton sigon kara ro pag-abot it international criminal court ukon ICC nga imaw ro maga-persecute kay Duterte.
Raya hay matapos nga kapin sa pitong dag-on imaw nga nakulong.
Mag-eowas kay duterte, nauna eon man nga ginakonsidera ni de lima ro pagpasaka man it kaso sa anang dating kaklase nga si Aguirre.
Mabahoe suno kana ro posibilidad nga magapasugot ro marcos administration sa pagsueod it ICC sa Pilipinas bagay nga amat-amat eon nga nagakasamad ro relasyon ni President Marcos ag Vice president Sara Duterte-Carpio.
