KALIBO, Aklan — Sa kauna-unahan nga kahigayunan hay magabisita sa banwa it Kalibo ro eight-time NBA All-Star ag dating Defensive Player of the Year nga si Dwight Howard sa maabot nga Hulyo 13, 2024 sa Magsaysay Park.
Suno kay Jay-ar Arante, head it media affairs it LGU Kalibo nga makasaysayan ro nasambit nga hitabu bangud nga raya ro unang beses nga may NBA star nga magabisita sa Kalibo.
Sa pag-abot it dating Orlando Magic franchise player hay makaangkon raya it meet and greet ag posibleng maghampang imaw ukon magpakita imaw it pilang basketball moves .
Gindugang pa kara nga gintinguhaan ni Kalibo Mayor Juris Sucro nga maimbitahan si Howard sa Aklan agud nga mataw-an it inspirasyon ro mga pamatan-on nga mahilig sa basketball nga kun sa siin kapareho sa hampang hay maipakita ro pagtinguha, tiyaga ag indi basta basta nga pagsurender sa anuman nga hangkat sa kabuhi.
Nasayuran nga si Dwight Howard hay naging import man it Pilipinas sa pilang international basketball tournament.
