KALIBO, Aklan — Pagbuhi sa spirit of voluntarism agud nga maamligan pa gid ro isla it Boracay.
Raya ro mga unang ginhimo nga tikang ni acting Malay Mayor Frolibar Bautista matapos nga iplastar sa publiko ro anang 100 days nga pagpanerbisyo sa mga Malaynon .
Suno kana nga sa anang pagpungko sa pwesto ko Hulyo 2 bilang acting capacity hay naging mabudlay para kana ro pag-usoy it mga job orders bangud nga bawae ro pag-hire ag pag-appoint pa kato it mga tawuhan.
Bangud sigon sa pagsalig kana it mga dating job orders hay nagtrabaho sanda nga owa it sweldo sa sueod it sang buean hasta daywang buean nga kaabuan kanda hay naga-mintinar it kalimpyo sa isla it Boracay.
Gintinguhaan man sigon nana nga ma-unite ro mga taga-Malay ag duea-on ro pulitika .
Owa man sigon imaw it ginpahalin nga mga trabahador nga kaalyado it anang kontra sa pulitika.
Ginpabugae man it alkalde ro anang mga programa ag proyekto nga napuslan it mga taga-Malay.
Samtang, ginakabig man nga accomplishment ni Mayor Bautista ro pagdeklara sa Boracay bilang best beach in Asia nga bunga sigon it ginpatigayon nga rehabilitasyon it gobyerno .
Dugang pa kara nga naging maayos ro implementasyon it mga ordinansa eabi eon sa Boracay bangud sa maayos nga main road, pagdakop sa mga kolorum nga motorsiklo ag iba pa .
Ginkalipay man nana ro pasadong grado it DILG nga 85% sa clearing operations bangud sa ginpatuman nga political will.
Suno pa kana nga ginpabaskog man nanda ro implementasyon it Project Boracay Enhanced Security Strategy and Tactics ukon BESST kaibahan ro mga nagkaeain-eain nga law enforcement agencies agud nga mapatuman ro disiplina sa isla .
Sa pihak nga parte, nakabaton man sigon it bastante nga bulig ag suporta ro pitong namatay nga paddlers it Boracay Dragon Force team hasta nga maiuli ro andang mga bangkay sa andang natungdan nga mga lugar.
Reporma sigon ro ginatutukan ni Bautista sa anang unang 100-days ag nagaeaum nga mas mapabag-o pa raya pinaagi sa pagbilog it maabu pang proyekto ag programa para sa banwa it Malay ag isla it Boracay.
